Gedicht von Hans Theus Anfangs Juli 1941

 

 

En Marsch voll Schneid und Rasse,

me ghörts jetzt ziemli viel,

ertönt dur eusi Gasse,

es isch z`Soldateschpiel.

 

De Hauptme, schtolz, beritte,

mit feschter Energie,

er füert in schtramme Schritte,

e flotti Kompanie.

 

Und vorne a der Schpitze,

grad hinderem Major,

gsesch d`Instrumänte blitze,

d`Musig schpielt eis vor.

 

En jede findets wichtig,

es Schpiel bim Militär,

`s wär überhaupt nöd richtig,

wänn das nöd ase wär.

 

E Musik macht Parade,

scho bime Bataillon,

Erscht s`Regiment, d`Brigade !

E ganzi Division!

 

Drumm jungi Schwizerchnabe,

uuf ! setzed Eu es Ziel,

und händ iihr Fliess und Gabe,

dänn meldet Eu zum Schpiel.

​